ᐃᑲᔪᖅᓱᕐᓗᒍ ᐊᑐᓕᖅᑎᑕᐅᓂᖓ ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖅ (IPA), ᐱᑎᑦᑎᕗᒍᑦ ᐃᓄᒃᑐᑦ ᐅᖃᐅᓯᕐᒧᑦ ᐸᕐᓇᐅᑎᒧᑦ ᖃᐅᔨᒪᔾᔪᑎᑦ.
ᑖᓐᓇ ᑎᑎᕋᖅᓯᒪᔪᖅ ᐱᑎᑦᑎᕗᖅ ᑐᑭᓯᓇᑦᑎᐊᖅᑐᒥᒃ ᖃᓄᐃᓕᐅᖁᔨᓂᕐᒥᒃ ᑲᑐᔾᔨᖃᑎᒌᓄᑦ, ᐃᓛᒃᑰᖅᑐᓄᑦ ᐱᓕᕆᕝᕕᒋᔭᐅᔪᓄᑦ ᐅᑯᓄᖓ:
- ᐅᖃᐅᓯᕐᓄᑦ ᐱᓕᕆᐊᕆᔭᕆᐊᖃᖅᑕᖏᓐᓂᒃ ᐅᑯᑎᒎᓇᖅ, IPA (ᑭᒃᑯᑐᐃᓐᓇᓄᑦ ᓇᓗᓇᐃᒃᑯᑕᑦ, ᑮᓇᐅᔭᓕᐅᕋᓱᖕᓂᕐᒧᑦ ᒪᓂᓴᐅᑎᑦ, ᓂᐅᕕᖅᐸᒃᑐᓄᑦ ᐱᓕᕆᕝᕕᒋᔭᐅᕙᒃᑐᓄᓪᓗ ᐱᔨᑦᑎᕋᕐᓂᕆᔭᐅᕙᒃᑐᑦ, ᐊᑭᓕᖅᑕᐅᔪᒪᔾᔪᑎᑦ, ᖃᐅᔨᒃᑲᐃᔾᔪᑎᑦ, ᐊᑐᖅᑕᐅᔭᕆᐊᖃᓪᓚᕆᒃᑐᓪᓗ ᑐᓴᐅᒪᔪᓕᕆᔾᔪᑎᑦ ᐃᓄᒃᑐᑦ).
- ᖃᓄᖅ ᐱᕙᒌᔭᕆᐊᖃᕐᒪᖔᑦ ᐃᓄᒃᑐᑦ ᐅᖃᐅᓯᕐᒧᑦ ᐱᕙᒌᔭᐅᑦ (ILP), ᐱᓕᕆᔾᔪᑎ ᐊᑐᖅᑕᐅᓲᖅ ᖃᐅᔨᓴᕈᑕᐅᓪᓗᓂ ᒫᓐᓇ ᐱᓕᕆᔾᔪᓯᕐᓂᒃ ᐊᒻᒪ ᐸᕐᓇᐅᑎᓕᐅᕈᑕᐅᓪᓗᓂ ᐊᑐᖅᑕᐅᓪᓚᑦᑖᕈᓐᓇᖅᑐᓂᒃ ᒪᓕᑦᑎᐊᓕᖁᓪᓗᒋᑦ ᐱᖁᔭᕐᒥᒃ.
- ᐱᓕᕆᐊᖑᑐᐃᓐᓇᕆᐊᓖᑦ ᐊᒻᒪ ᐊᑐᖅᑕᐅᔪᓐᓇᖅᑐᑦ, ᓲᕐᓗ ᑎᑎᖅᑲᑦ ᑐᑭᓕᐅᖅᑕᐅᓗᑎᒃ, ᐃᖅᑲᓇᐃᔭᖅᑎᑦ ᐅᖃᐅᓯᖏᓐᓂᒃ ᐃᓕᓐᓂᐊᖅᑎᑦᑎᓗᑎᒃ, ᑐᓵᔨᑖᕐᓗᑎᒃ, ᐱᓕᕆᕝᕕᖕᒥ ᐱᓕᕆᔾᔪᓯᕐᓂᒃ ᐱᕙᓪᓕᐊᑎᑦᑎᓗᑎᒃ, ᐊᒻᒪ ᐃᓄᒃᑐᑦ ᐱᔨᑦᑎᕋᐅᑎᑦ ᑕᑯᒃᓴᐅᓂᖅᓴᐅᓕᕐᓗᑎᒃ.
- ᕿᒥᕐᕈᔭᐅᓂᖓ ᐊᖏᖅᑕᐅᓂᖓᓗ ᐱᓕᕆᐊᖑᕙᓪᓕᐊᔪᖅ ᐅᖃᐅᓯᕐᓄᑦ ᑲᒥᓯᓇᐅᑉ ᐊᒡᓚᒡᕕᐊ ᓄᓇᕗᒻᒥ (OLCN).
- ᐋᖅᑭᒃᓯᒪᓂᕆᓂᐊᖅᑕᖓ ᐃᓂᖃᖅᑎᑦᑎᓂᕐᒧᑦ IPA−ᑯᑦ, ᒪᓂᒪᑎᑕᐅᔪᖅ ᐃᓛᒃᑰᖅᑐᓄᑦ ᑲᑐᔾᔨᖃᑎᒌᓄᑦ ᑕᑯᒃᓴᐅᑎᑦᑎᔪᓄᑦ ᐊᖏᔪᑲᓪᓚᖕᓂᒃ ᐊᓂᒍᖅᑎᓐᓇᓱᒋᐊᓕᖕᓂᒃ ᐊᔪᕐᓇᖅᑐᖅᓯᐅᕈᑕᐅᔪᓂᒡᓘᓐᓃᑦ ᐊᖑᒻᒪᑎᔪᒪᓪᓗᑎᒃ ᐱᔭᒃᓴᕆᔭᒥᓄᑦ.
ᑖᒃᑯᐊ ᐊᑐᐊᒐᐃᑦ ᓇᓗᓇᐃᔭᖅᓯᒪᖕᒥᔪᑦ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑉ ᐱᓕᕆᐊᒃᓴᖏᓐᓂᒃ ᕿᒥᕐᕈᓇᒃᑎᓪᓗᒍ, ᓇᐅᑦᑎᖅᓱᐃᑎᓪᓗᒍ, ᐊᒻᒪ, ᑕᐃᒪᐃᑦᑕᕆᐊᖃᕌᖓᑦ, ᐋᖅᑭᒋᐊᖅᓯᔭᕆᐊᖃᖅᑎᓪᓗᒍ ᑐᓂᔭᐅᓯᒪᔪᓂᒃ ᐸᕐᓇᐅᑎᓂᒃ. ᑖᒃᑯᐊ ᑕᐃᒪᐃᓐᓂᖓᓄᑦ ᐱᔭᕆᐊᖃᓪᓚᕆᒃᐳᑦ ᒪᓕᑦᑎᐊᕐᓂᕐᒧᑦ ᐱᓕᕆᔾᔪᑕᐅᓪᓗᑎᒃ ᑕᒪᐃᓐᓄᑦ ᑲᑐᔾᔨᖃᑎᒌᓄᑦ ᐱᑎᑦᑎᕙᒃᑐᓄᑦ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑭᒃᑯᑐᐃᓐᓇᓄᑦ ᓄᓇᕗᒻᒥ.
ᑕᑯᔪᓐᓇᖅᑕᐃᑦ ᐊᑕᖏᖅᑐᑦ ᑎᑎᕋᖅᓯᒪᔪᑦ ᐅᕙᙵᑦ: ᖃᐅᔨᒪᔾᔪᑎᑦ − ᐃᓄᐃᑦ ᐅᖃᐅᓯᖓᓄᑦ ᐸᕐᓇᐅᑎᑦ