ᐊᐱᖅᑯᑕᐅᒐᔪᒃᑐᑦ

ᐄ. ᓇᓕᐊᑐᐃᓐᓇᖅ ᑲᑐᔾᔨᖃᑎᒌᖑᔪᖅ ᐊᐅᓚᓂᖃᖅᑐᖅ ᓄᓇᕗᒻᒥ − ᐃᓚᒋᔭᐅᓪᓗᑎᒃ ᐃᓛᒃᑰᖅᑐᑦ ᓇᖕᒥᓂᕆᔭᐅᔪᑦ − ᐱᑎᑦᑎᔭᕆᐊᖃᖅᐳᑦ ᐊᑐᖅᑕᐅᓪᓗᐊᑕᖅᐸᒃᑐᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑐᓴᐅᒪᑎᑦᑎᓂᕐᒥᒡᓗ ᑭᒃᑯᑐᐃᓐᓇᓄᑦ ᐃᓄᒃᑐᑦ, ᖄᒃᑲᓐᓂᐊᒍᓪᓗ ᓇᓕᐊᖕᓂᑐᐃᓐᓇᖅ ᐅᖃᐅᓯᕐᓂᒃ ᐊᑐᖅᑕᐅᕙᒃᑐᓂᒃ.  ᑖᒃᑯᐊ ᐱᓕᕆᐊᒃᓴᐃᑦ ᓇᓗᓇᐃᖅᓯᒪᔪᑦ ᐊᑖᓂ ᐃᓚᒍᑖ 3 ᐃᓄᒃᑐᑦ ᓴᐳᒻᒥᔭᐅᓂᖓᓄᑦ ᐱᖁᔭᖅ (IPA).

ᓇᖕᒥᓂᕆᔭᐅᔪᑦ ᐱᑎᑦᑎᔭᕆᐊᖃᖅᐳᑦ, ᐊᓯᖏᓪᓗ:

• ᑭᒃᑯᑐᐃᓐᓇᓄᑦ ᓇᓗᓇᐃᒃᑯᑕᑦ (ᓇᓗᓇᐃᒃᑯᑕᑦ, ᐊᑭᓐᓇᕐᒥᐅᑕᑦ, ᑐᐊᕕᕐᓇᖅᑐᓄᑦ ᐊᓂᕝᕕᖕᓄᓪᓗ ᓇᓗᓇᐃᒃᑯᑕᑦ)
• ᐱᓕᕆᕝᕕᖃᖅᑐᓄᑦ ᒪᓂᓴᐅᑎᑦ ᐊᒻᒪ ᐱᕚᓪᓕᕈᑎᒃᓴᑦ
• ᑎᑎᕋᖅᑎ, ᐊᑭᓕᖅᓱᐃᔨᓄᑦ ᐱᔨᑦᑎᕋᖅᑕᐅᔪᓄᓪᓗ ᐱᔨᑦᑎᕋᖅᑎᑦ

ᓇᖕᒥᓂᕆᔭᐃᑦ ᒪᓂᒪᑎᑦᑎᒃᐸᑦ ᐱᑐᐃᓐᓇᐅᙱᑦᑐᑦ ᐱᔨᑦᑎᕋᕐᓂᕆᔭᐅᕙᒃᑐᑦ — ᓲᕐᓗ ᐋᓐᓂᐊᖃᕐᓇᙱᑦᑐᓕᕆᓂᖅ, ᑐᙵᓱᒃᑎᑦᑎᓂᖅ, ᓂᕿ, ᐃᒡᓗᓕᕆᓂᖅ, ᐃᒪᖅ, ᐆᒻᒪᖅᑯᑎᑦ, ᐅᖅᓱᐊᓗᒃ, ᐅᕝᕙᓘᓐᓃᑦ ᑐᓴᐅᒪᔪᓕᕆᔾᔪᑎᑦ — ᐱᑎᑦᑎᔭᕆᐊᖃᕐᒥᔪᑎᑦ:

• ᐊᑭᓕᒐᒃᓴᑦ ᐊᑭᓕᒐᒃᓴᐃᓪᓗ
• ᖃᐅᔨᒃᑲᐃᔾᔪᑎᑦ ᐃᓂᖅᑎᕆᔾᔪᑏᓪᓗ
• ᐊᔪᕆᖅᓲᔾᔨᓯᒪᔪᑦ ᐊᒻᒪ ᐱᔨᑦᑎᕋᖅᑕᐅᓂᕐᒧᑦ ᑐᑭᓯᒋᐊᒐᒃᓴᑦ
• ᓂᕆᔭᒃᓴᑦ (ᓂᕆᔭᖅᑐᕐᕕᖕᓄᑦ ᑐᔪᕐᒥᕕᖕᓄᓪᓗ)
• ᓇᓕᐊᑐᐃᓐᓇᖅ ᐊᑐᖁᔭᐅᔪᑦ ᑐᓴᐅᒪᔪᓕᕆᔾᔪᑎᑦ ᑎᑎᕋᖅᓯᒪᓂᓕᒃ 3 ᒪᓕᒡᓗᒍ IPA−ᒥ

ᑕᒪᒃᑯᐊᓕᒫᑦ ᑐᓂᔭᐅᔭᕆᐊᖃᖅᐳᑦ ᑐᑭᓯᓇᑦᑎᐊᖅᑐᖅ ᑐᑭᓯᓇᖅᑐᕐᓗ ᐃᓄᒃᑐᑦ.

ᑐᓂᓯᔪᓐᓇᖅᐳᑎᑦ ᐆᒥᖓ ᐃᓂᖃᖅᑎᑕᐅᔪᒪᓂᕐᒧᑦ ᑐᒃᓯᕋᐅᑦ ᐅᑯᓄᖓ ᐅᖃᐅᓯᕐᓄᑦ ᑲᒥᓯᓇᐅᑉ ᐊᒡᓚᒡᕕᐊ ᓄᓇᕗᒻᒥ (OLCN).  ᐃᒡᓗᖃᖅᑎᑕᐅᓂᖅ ᒪᓂᒪᑎᑕᐅᕙᒃᐳᖅ ᒫᓐᓇᑲᐅᑎᒋ ᒪᓕᑦᑎᐊᕐᓂᖅ ᓴᖅᑭᑎᑦᑎᓇᔭᖅᐸᑦ ᐊᔪᕐᓇᖅᑐᖅᓯᐅᕐᓂᖅ, ᐅᕝᕙᓘᓐᓃᑦ ᑲᑐᔾᔨᖃᑎᒌᑦ ᐱᔨᑦᑎᕋᓪᓗᐊᑕᕌᖓᑕ ᐃᓄᓪᓚᑦᑖᖑᙱᑦᑐᓂᒃ ᐅᖃᐅᓯᓕᕆᔨᓂᒃ ᐅᕝᕙᓘᓐᓃᑦ ᐃᓕᖅᑯᓯᓕᕆᔨᓂᒃ ᓄᓇᓕᖕᓂ.

ᑖᓐᓇ ᐱᓕᕆᔾᔪᓯᖅ ᐱᕕᖃᖅᑎᑦᑎᕗᖅ ᓇᖕᒥᓂᕆᔭᐅᔪᓂᒃ ᑐᒃᓯᕋᕈᓐᓇᕐᓗᑎᒃ ᐱᓕᕆᐊᖑᖔᕈᓐᓇᖅᑐᑦ ᐅᕝᕙᓘᓐᓃᑦ ᐱᓪᓚᑦᑖᖑᓂᖅᓴᒥᒃ ᐊᑐᓕᖅᑎᑕᐅᓂᒃᓴᖓ.

ᑭᓯᐊᓂ ᓇᒻᒥᓂᖃᖅᑏᑦ ᑲᑐᔾᔨᖃᑎᒌᖏᑦ ᑐᒃᓯᕋᑐᐃᓐᓇᕆᐊᓕᒃ ᐃᓂᖃᖅᑎᑕᐅᔪᒪᓗᓂ ᐅᑯᑎᒎᓇᖅ, ᐃᓚᒍᑖ 3(5) IPA−ᒥ.  ᕼᐋᒻᒪᓚᐃᑦ ᑭᒃᑯᑐᐃᓐᓇᕐᓄᓪᓗ ᑎᒥᐅᔪᑦ ᐊᔪᖅᑐᖅ ᑐᒃᓯᕋᕐᓗᑎᑦ ᐃᓂᖃᖅᑎᑕᐅᔪᒪᓂᕐᒥᒃ.

ᐄ.  ᑕᒪᕐᒥᑦᑎᐊᖅ ᐃᓂᖃᖅᑎᑕᐅᔪᒪᓂᕐᒧᑦ ᐱᔪᒪᔾᔪᑕᐅᔪᑦ ᐃᓚᖃᕆᐊᖃᖅᐳᑦ ᐊᖏᖅᑕᐅᓯᒪᔪᒥᒃ ᓄᑖᙳᕆᐊᖅᓯᒪᔪᒥᒡᓘᓐᓃᑦ ᐃᓄᐃᑦ ᐅᖃᐅᓯᖓᓄᑦ ᐸᕐᓇᒃᑕᐅᓯᒪᔪᒧᑦ.