ᐃᓄᐃᑦ ᐅᖃᐅᓯᖏᓐᓄᑦ ᐱᔨᑦᑎᕋᐅᑎᑦ ᐊᑐᖅᑕᐅᓂᖏᓪᓗ
ᐱᓕᕆᐊᒃᓴᕆᔭᑦ ᑲᑐᔾᔨᖃᑎᒌᒡᕕᓕᒫᓂᒃ
3. (1) ᑲᑐᔾᔨᖃᑎᒌᓕᒫᑦ ᐃᒪᐃᓕᐅᖃᑦᑕᕐᓂᐊᖅᐳᑦ, ᒪᓕᒡᓗᒍ ᑖᓐᓇ ᐊᒡᒍᖅᓯᒪᓂᖓ ᒪᓕᒋᐊᓖᓪᓗ, ᒪᓕᒋᐊᓕᒃᑕᖃᖅᐸᑦ,
(a) ᓴᖅᑭᔮᖅᑎᓪᓗᒋᑦ ᐃᓄᖕᓄᑦ ᓇᓗᓇᐃᒃᑯᑕᑦ, ᐃᓚᓕᐅᑎᓗᒋᑦ ᑐᐊᕕᕐᓇᖅᑐᒃᑯᕕᖕᓅᖓᔪᑦ ᐊᓂᕝᕖᓪᓗ ᓇᓕᖅᑲᖏᑦ, ᐃᓄᐃᑦ ᐅᖃᐅᓯᖓᑎᒍᑦ ᐊᑕᐅᑦᑎᒃᑯᑦ ᐊᓯᖏᓐᓄᑦ ᐅᖃᐅᓯᕐᓄᑦ ᐊᑐᖅᑕᐅᔪᓄᑦ.
(b) ᓴᖅᑭᔮᖅᑎᓪᓗᒋᑦ ᓴᖅᑭᓪᓗᒋᓪᓗ ᐊᑭᓐᓇᒥᐅᑕᑦ ᐊᒻᒪ ᐱᓕᕆᕝᕕᖃᖅᑐᓄᑦ ᒪᓂᓴᐅᑎᑦ, ᐱᑕᖃᖅᐸᑦ, ᐃᓄᐃᑦ ᐅᖃᐅᓯᖓᒍᑦ ᐊᑕᐅᑦᑎᒃᑯᑦ ᐊᓯᖏᓐᓂᒃ ᐅᖃᐅᓯᖅᑕᓂᒃ ᐊᑐᖅᑕᐅᔪᓂᒃ.
(c) ᐃᓄᐃᑦ ᐅᖃᐅᓯᖏᑦᑕ ᑎᑎᕋᖅᓯᒪᔪᑦ ᑭᒃᑯᓕᒫᓄᑦ ᓇᓗᓇᐃᒃᑯᑕᑦ, ᐊᑭᓐᓇᕐᒥᐅᑕᑦ ᐊᒻᒪ ᐱᓕᕆᕝᕕᖃᖅᑐᓄᑦ ᒪᓂᓴᐅᑎᑦ ᐊᔾᔨᑦᑎᐊᖓᓂᒃ ᐅᔾᔨᕐᓇᕐᓗᑎᒃ ᐊᓯᖏᓐᓄᑦ ᐅᖃᐅᓯᕐᓄᑦ ᐊᑐᖅᑕᐅᔪᓄᑦ; ᐊᒻᒪᓗ
(d) ᐊᑐᐃᓐᓇᐅᑎᑦᑎᓗᓂ, ᐃᓄᐃᑦ ᐅᖃᐅᓯᖓᒍᑦ, ᑭᐅᔨᖏᓐᓄᑦ ᐊᒻᒪᓗ ᓇᓕᐊᑐᐃᓐᓇᖅ ᐱᔨᑦᑎᖅᑕᐅᔪᓄᑦ ᐅᕝᕙᓘᓐᓃᑦ ᐱᔨᑦᑎᖅᑕᐅᔪᓄᑦ ᐊᑐᐃᓐᓇᐅᔪᓄᑦ ᑭᒃᑯᑐᐃᓐᓇᕐᓄᑦ.
ᐱᔨᑦᑎᕋᓕᕌᖓᑕ ᐃᓄᒃᑎᑐᑦ ᐅᖃᓪᓚᒡᓗᑎᒃ ᐱᔨᑦᑎᕋᖅᐸᓕᕐᓗᑎᒃ
(2) ᑲᑐᔾᔨᖃᑎᒌᖑᔪᖅ ᑐᓴᐅᒪᑎᑦᑎᖃᑦᑕᕐᓂᐊᖅᐳᖅ ᑭᒃᑯᑐᐃᓐᓇᓂᒃ ᐃᓄᐃᑦ ᐅᖃᐅᓯᖓᒍᑦ ᑲᔪᓯᑎᑦᑎᓕᕌᖓᒥᒃ ᐅᑯᓂᖓ ᐱᑐᐃᓐᓇᐅᙱᑦᑐᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒃ:
(a) ᐱᔭᕆᐊᖃᓪᓚᕆᒃᑐᑦ ᐱᔨᑦᑎᕋᐅᑎᑦ, ᐃᓚᓕᐅᔾᔭᐅᓪᓗᑎᒃ
(i) ᑐᐊᕕᕐᓇᖅᑐᖅ, ᐃᓅᓕᒃᓯᓂᖅ ᐅᕝᕙᓘᓐᓃᑦ ᐊᔾᔨᒐᓚᖓᓂᒃ ᑐᐊᕕᕐᓇᖅᑐᓂᒃ ᐱᔨᑦᑎᕋᐅᑎᓂᒃ ᐅᕝᕙᓘᓐᓃᑦ ᓄᖅᑲᖅᑎᑦᑎᔾᔪᑎᓂᒃ, ᐱᖃᓯᐅᑎᓪᓗᒋᑦ ᐃᓯᖅᑎᑦᑎᕙᒃᑐᑦ ᐅᕝᕙᓘᓐᓃᑦ ᐱᔨᑦᑎᕋᖅᑕᐅᕙᒃᑐᑦ, ᐊᒻᒪ
(ii) ᐋᓐᓂᐊᖃᕐᓇᙱᑦᑐᓕᕆᔨᑦ, ᐋᓐᓂᐊᕐᕕᖕᒥ ᐅᕝᕙᓘᓐᓃᑦ ᐄᔭᒐᖅᑖᕐᕕᖕᓂ ᐱᔨᑦᑎᕋᖅᑏᑦ.
(b) ᐃᒡᓗᒥᐅᖃᑎᒌᓄᑦ, ᐊᖏᕐᕋᕆᔭᐅᔪᓄᑦ ᑐᙵᓱᒃᑎᑦᑎᓂᕐᒧᓪᓘᓐᓃᑦ ᐱᔨᑦᑎᕋᕐᓂᕆᔭᐅᕙᒃᑐᑦ, ᐃᓚᒋᔭᐅᓪᓗᑎᒃ
(i) ᓂᕆᕝᕕᒃ, ᑐᔪᕐᒥᕕᒃ, ᓯᓂᒃᑕᕐᕖᑦ, ᐊᖏᕐᕋᕆᔭᐅᔪᓂ ᐅᕝᕙᓘᓐᓃᑦ ᐃᒡᓗᓕᕆᔨᒃᑯᓐᓂ, ᐊᒻᒪ
(ii) ᐱᔨᑦᑎᕋᐅᑕᐅᒐᔪᒃᑐᑦ ᐃᒡᓗᒥᐅᖃᑎᒌᓄᑦ, ᐅᑯᐊᓗ ᓄᑭᓪᓚᐅᑎᖃᖅᑎᑦᑎᓃᑦ, ᐅᖅᓱᐊᓗᒃ, ᐃᒪᖅ ᐊᒻᒪ ᐅᖃᓘᑎᑦ.
(c) ᐊᓯᖏᑦ ᐱᔨᑦᑎᕋᐅᑕᐅᖁᔭᐅᔪᑦ ᑲᒥᓯᓇᐅᑉ ᓯᕗᓕᖅᑎᒃᑯᑦ ᑲᑎᒪᔨᖏᓐᓂ ᓈᒻᒪᒐᓱᒋᔭᖏᑦ ᐱᔾᔪᑎᒋᓪᓗᒋᑦ ᐱᒻᒪᕆᐅᓂᖏᑦ ᐅᕝᕙᓘᓐᓃᑦ ᐱᒻᒪᕆᐅᔪᑦ ᓴᖅᑭᔾᔪᑕᐅᓲᑦ ᐃᓄᖕᓄᑦ.
ᑐᓴᒐᒃᓴᓕᕆᔩᑦ
(3) ᐃᓚᒃᑲᓐᓂᖓ ᐱᔭᕆᐊᓕᑦ ᐊᒡᒍᖅᓯᒪᓂᓕᒃ (1)−ᒥ, ᑐᓴᐅᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐅᖃᐅᓯᐅᔪᓄᑦ ᐃᓚᒃᑲᓐᓂᖓᓂ (2) ᐃᒪᐃᓕᖓᔪᑦ:
(a) ᖃᐅᔨᒃᑲᐃᔾᔪᑎᓕᒫᑦ, ᐅᔾᔨᖅᓱᖁᔨᔪᑦ ᐅᕝᕙᓘᓐᓃᑦ ᐊᔪᕆᖅᓲᔾᔨᔪᑦ ᐊᑐᖅᑎᓄᑦ ᐅᕝᕙᓘᓐᓃᑦ ᓂᐅᕕᖅᐸᒃᑐᓄᑦ ᐱᔨᑦᑎᕋᖅᑕᐅᕝᕕᖕᒥ.
(b) ᑕᖅᑭᑕᒫᑦ ᐊᑭᓕᕆᐊᓖᑦ, ᐊᑭᓕᖅᑕᐅᔪᒪᔾᔪᑏᑦ ᐊᔾᔨᐸᓗᖏᓪᓗ ᐱᔭᐅᔪᒪᕙᒃᑐᑦ ᑐᕌᖅᑎᑕᐅᔪᑦ ᐃᓄᖕᓄᑦ ᐃᓄᐃᑦ ᐅᖃᐅᓯᖏᓐᓂᒃ ᐅᖃᓪᓚᒍᓐᓇᖅᑐᓄᑦ.
(c) ᐊᓯᖏᑦ ᑐᓴᐅᒪᖃᑦᑕᐅᑎᓃᑦ ᑲᒥᓯᓇᐅᑉ ᓯᕗᓕᖅᑎᒃᑯᑦ ᑲᑎᒪᔨᖏᓐᓄᑦ ᐊᑐᖅᑎᑦᑎᔪᓐᓇᖅᑐᑦ.
ᐊᓯᖏᑦ ᑎᑎᕋᖅᓯᒪᔪᒃᑯᑦ ᑐᓴᐅᒪᔪᓕᕆᔾᔪᑎᑦ
(4) ᐊᒡᒍᖅᓯᒪᒃᑲᓐᓂᖅᑐᖅ (3) ᐊᑑᑎᖃᖅᑐᑦ ᑕᒪᐃᓐᓄᑦ ᐅᖃᐅᓯᒃᑯᑦ ᑎᑎᕋᐅᓯᒃᑯᓪᓗ ᑐᓴᐅᒪᔪᓕᕆᔾᔪᑎᓄᑦ.
ᑐᔪᕐᒥᕖᑦ ᐃᒻᒥᒃᑰᖅᑐᓄᑦ ᑎᒥᐅᔪᓄᑦ
(5) ᑖᓐᓇ ᐅᖃᐅᓯᕐᓄᑦ ᑭᒐᖅᑐᖅᑎ, ᐱᐊᓪᓚᓚᐅᕐᓗᓂ ᑐᓂᔭᐅᔪᒥᒃ ᐅᕙᓘᓐᓃᑦ ᐱᓇᔫᒻᒥᒃ ᐊᑐᕐᓗᒍ ᐃᓚᖓᑦ 4, ᐊᒻᒪᓗ ᓄᓇᕗᒻᒥ ᐃᖅᑲᖅᑐᐃᕕᒃ, ᐱᐊᓪᓚᓚᐅᕐᓗᓂ ᑐᒃᓯᕋᐅᑎᒥᒃ ᐊᑖᒍᑦ ᐃᓚᖓᑦ 4, ᐲᖅᓯᔪᓐᓇᖅᑐᖅ ᐃᒻᒥᒃᑰᖅᑐᒥᒃ ᑎᒥᐅᔪᒥᒃ ᐊᑐᖅᑕᐅᒋᐊᓕᖕᒥᒃ ᐊᓯᐊᒍᑦ ᐱᔭᕆᐊᖃᕋᔭᖅᑐᒥᒃ ᐊᑖᒍᑦ ᐆᒪ ᐃᓚᖓᓂ ᐊᒻᒪ ᐃᓇᖐᓗᓂ ᐱᔭᕆᐊᑭᓐᓂᖅᓴᒥᒃ ᐊᑐᕆᐊᓕᖕᒥᒃ ᑐᓴᐅᒪᖃᑎᒌᖕᓂᕐᒧᑦ ᐅᕝᕙᓘᓐᓃᑦ ᐱᔨᑦᑎᕋᐅᑎᓄᑦ ᐃᓄᐃᑦ ᐅᖃᐅᓯᖓᑎᒍᑦ, ᐃᒪᐃᑉᐸᑦ
(a) ᓇᒻᒥᓂᖃᖅᑎᐅᔪᑦ ᓴᖅᑭᖅᑕᐅᓯᒪᔪᑦ ᐱᔾᔪᑎᖃᖅᑐᑎᑦ ᐱᖅᑯᓯᓕᕆᓂᕐᒥᑦ, ᐅᖃᐅᓯᖃᕐᓂᕐᒥᑦ, ᓴᙱᓕᑎᑦᓯᓂᕐᒥᑦ ᓴᖅᑭᔮᖅᑎᑦᓯᓂᕐᒥᓪᓘᓐᓃᑦ ᐃᓄᓪᓚᕆᐅᖏᑦᑐᓂᑦ ᐅᖃᐅᓯᕐᒥᑦ ᐃᓕᖅᑯᓯᕐᒥᓪᓘᓐᓃᑦ ᓄᓇᓕᓐᓂᑦ; ᐅᕝᕙᓘᓐᓃᑦ
(b) ᓈᒻᒪᒍᓱᒃᑐᑦ ᒪᓕᑦᑎᐊᕐᓂᖅ ᑖᔅᓱᒥᖓ ᐃᓚᖓᓂ ᐃᓚᖓᑕ ᓇᖕᒥᓂᕆᔭᕐᒧᑦ ᑎᒥᐅᔪᒧᑦ ᐱᑎᑦᑎᓇᔭᕐᓂᖓᓂᒃ ᐊᒃᓱᕈᕐᓇᖅᑐᒥᒃ.