ᐅᖃᐅᓯᕐᓄᑦ ᐃᓕᑕᕆᔭᐅᓯᒪᔪᓄᑦ ᐱᖁᔭᖅ (OLA)
ᐅᖃᐅᓯᕐᓄᑦ ᐃᓕᑕᕆᔭᐅᓯᒪᔪᑦ ᐱᖁᔭᖓ ᓄᓇᕗᒻᒥ ᐃᓕᑕᖅᓯᓯᒪᕗᖅ ᐱᖓᓱᓂᒃ ᐃᓕᑕᕆᔭᐅᓯᒪᔪᓂᒃ ᐅᖃᐅᓯᕐᓂᒃ: ᐃᓄᒃᑐᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ, ᐅᐃᕖᑎᑐᓪᓗ.
ᐱᔪᓐᓇᖅᑎᑦᓯᕗᖅ ᓄᓇᕗᒻᒥᐅᓂᒃ ᐱᔪᓐᓇᐅᑎᖃᕐᓂᕐᒥᒃ ᐅᖃᖃᑎᖃᕈᓐᓇᕐᓂᕐᒥᒃ ᐱᔨᑦᓯᕋᖅᑕᐅᔪᓐᓇᕐᓂᕐᒥᓪᓗ ᓄᓇᕗᑦ ᒐᕙᒪᒃᑯᖏᓐᓂᑦ, ᒪᓕᒐᓕᐅᕐᕕᒻᒥᑦ, ᐃᖅᑲᖅᑐᐃᕕᓐᓂᑦ, ᕼᐋᒻᒪᓚᒋᔭᐅᔪᓂᓪᓗ ᐃᓕᑕᕆᔭᐅᓯᒪᔪᒥᒃ ᐅᖃᐅᓯᕐᒥᒃ ᐊᑐᕈᒪᔭᒥᓂᒃ.
ᐱᔭᕆᐊᖃᖅᑎᑦᓯᕗᖅ ᑭᒃᑯᑐᐃᓐᓇᓄᑦ ᐃᓂᒋᔭᐅᕙᑦᑐᓂᒃ ᐊᑐᐃᓐᓇᐅᑎᑦᓯᓂᕐᒧᑦ ᐱᔨᑦᓯᕋᕐᓂᕆᔭᒥᓂᒃ ᑕᒪᒃᑯᓇᓂ ᐅᖃᐅᓯᕐᓂᑦ.
ᐋᖅᑭᑦᓯᓯᒪᒋᕗᖅ ᐅᖃᐅᓯᕐᓄᑦ ᑲᒥᓯᓇᐅᑉ ᐊᓪᓚᕝᕕᐊᑕ ᐱᓕᕆᐊᑦᓴᖏᓐᓂᒃ ᖃᐅᔨᓴᖅᑎᐅᓗᓂ ᑭᒡᒐᖅᑐᐃᔨᐅᓗᓂᓗ ᑖᒃᑯᓄᖓ ᐱᔪᓐᓇᐅᑎᓂᑦ.
ᕿᒥᕐᕈᓗᒋᑦ ᑲᑎᖅᓱᖅᓯᒪᔪᑦ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖓ:
ᐃᓕᑕᕆᔭᐅᓯᒪᔪᑦ ᐅᖃᐅᓯᕐᓄᑦ ᐱᖁᔭᖅ, ᐃᓕᑕᕆᔭᐅᓯᒪᔪᑦ ᑲᑎᖅᓱᖅᑕᐅᓂᖏᑦ | ᒪᓕᒐᒃᓴᐃᑦ
ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖅ (IPA)
ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖅ (IPA) ᑐᕌᒐᖃᖅᐳᖅ ᓴᐳᔾᔨᓯᒪᓂᕐᒥᒃ, ᐅᔾᔨᕐᓇᖅᓯᑎᑦᓯᓂᕐᒥᒃ ᐱᕙᓪᓕᐊᑎᑦᓯᓂᕐᒥᓪᓗ ᐃᓄᒃᑐᑦ ᐆᒪᓗᓂ ᐅᖃᐅᓯᕐᒥᒃ ᓇᐅᒃᑯᓕᒫᖅ ᑭᒃᑯᑐᐃᓐᓇᓄᑦ ᐃᓅᓯᕆᔭᐅᔪᓂ, ᐃᓚᒋᔭᐅᓪᓗᓂ ᐃᖅᑲᓇᐃᔭᕐᓂᖅ, ᐃᓕᓐᓂᐊᕐᓂᓕᕆᓂᖅ ᑭᒃᑯᑐᐃᓐᓇᓄᓪᓗ ᐱᔨᑦᓯᕋᕐᓂᕆᔭᐅᕙᑦᑐᓂ ᓄᓇᕘᓕᒫᒥ.
ᐊᑖᓂ ᐃᓚᒍᑖ 3 ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᕐᒥ, ᑲᑐᔾᔨᖃᑎᒌᕝᕖᑦ — ᐃᓚᒋᔭᐅᓪᓗᑎᒃ ᑭᒃᑯᑐᐃᓐᓇᓄᑦ ᑎᒥᐅᔪᑦ, ᕼᐋᒻᒪᓚᒃᑯᑦ, ᐃᓛᒃᑰᖅᑐᑦ ᑲᑐᔾᔨᖃᑎᒌᑦ ᒐᕙᒪᑐᖃᒃᑯᓪᓗ ᐱᓕᕆᕝᕕᖏᑦ ᐊᐅᓚᑕᐅᔪᑦ ᓄᓇᕗᒻᒥ — ᖃᐅᔨᒪᑦᓯᐊᕆᐊᖃᖅᐳᑦ ᐃᓄᒃᑐᑦ ᐊᑐᐃᓐᓇᐅᒐᓗᐊᕐᒪᖔᑦ ᐅᑯᓇᓂ:
- ᑭᒃᑯᑐᐃᓐᓇᓄᑦ ᓇᓗᓇᐃᒃᑯᑕᐃᑦ (ᐃᓚᒋᔭᐅᓗᑎᒃ ᑐᐊᕕᕐᓇᖅᑐᓄᑦ ᐊᓂᕝᕕᓐᓄᓪᓗ ᓇᓗᓇᐃᒃᑯᑕᐃᑦ)
- ᐊᑭᓐᓇᕐᒥᐅᑕᐃᑦ ᐱᓕᕆᕝᕕᖃᖅᑐᓄᓪᓗ ᓴᖅᑭᔮᖅᑎᑦᓯᓂᕐᒧᑦ
- ᑐᙵᓵᕆᔨᒃᑯᑦ, ᐊᑭᓕᖅᑐᐃᔨᓄᑦ ᐱᔨᑦᓯᕋᖅᑕᐅᔪᓄᓪᓗ ᐱᔨᑦᓯᕋᖅᑏᑦ
- ᐱᔭᕆᐊᖃᓪᓚᕆᒃᑐᑦ ᐱᔨᑦᓯᕋᕐᓂᕆᔭᐅᕙᑦᑐᑦ ᓲᕐᓗ ᐋᓐᓂᐊᖃᕐᓇᙱᑦᑐᓕᕆᓂᖅ, ᐃᓪᓗᓕᕆᓂᖅ, ᓂᕿᓕᕆᓂᖅ, ᐃᒪᖅ, ᐅᖅᓱᐊᓗᒃ, ᑐᓴᐅᒪᖃᑦᑕᐅᑎᓂᖅ
- ᖃᐅᔨᒃᑲᐃᔾᔪᑏᑦ, ᐃᓂᖅᑎᕆᔾᔪᑏᑦ, ᐊᔪᕆᖅᓲᔾᔨᔾᔪᑎᑦ, ᐊᑭᓕᕋᑦᓴᐃᑦ, ᐊᑭᓕᖅᑕᐅᔪᒪᔾᔪᑏᑦ, ᐊᓯᖏᓪᓗ ᑐᓴᐅᒪᔪᓕᕆᔾᔪᑏᑦ
ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᒃᑯᑦ ᑎᓕᓯᓯᒪᒋᕗᑦ ᐅᑯᓂᖓ ᐅᖃᐅᓯᕐᓄᑦ ᑲᒥᓯᓇᐅᑉ ᐊᓪᓚᕝᕕᐊ ᓄᓇᕗᒻᒥ (OLCN) ᑲᒪᒋᔭᖃᕐᓂᕐᒥᑦ ᒪᓕᑦᓯᐊᕐᓂᕐᒥᑦ, ᐅᖃᐅᔾᔨᒋᐊᕐᓂᕐᒥᑦ ᑲᑐᔾᔨᖃᑎᒌᓂᑦ, ᖃᐅᔨᓴᕐᓂᕐᒥᑦ ᐱᔨᑦᓯᕋᕐᓂᕐᒥᑦ ᑲᔪᓯᑎᑦᓯᓂᕐᒧᑦ ᐊᑲᐅᓂᖅᓴᒃᑰᕆᐊᖅᑎᑦᓯᓂᕐᒥᓪᓗ ᑐᕌᒐᖏᑦ ᒪᓕᑦᑕᐅᖏᑉᐸᑕ.
ᕿᒥᕐᕈᓗᒋᑦ ᑲᑎᖅᓱᖅᓯᒪᔪᑦ ᐃᓕᑕᕆᔭᐅᓯᒪᔪᑦ ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖓᓂ:
ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖅ, ᑲᑎᖅᓱᖅᑕᐅᓂᖏᑦ ᐃᓕᑕᕆᔭᐅᓯᒪᔪᑦ | ᒪᓕᒐᓂᐊᖑᓯᒪᔪᑦ